nasiib aazamaane ke din aa rahe hai.n

nasiib aazamaane ke din aa rahe hai.n

qariib un ke aane ke din aa rahe hai.n

jo dil se kahaa hai jo dil se sunaa hai

sab un ko sunaane ke din aa rahe hai.n

abhii se dil-o-jaa.N sar-e-raah rakh do

ke luTane luTaane ke din aa rahe hai.n

Tapakane lagii un nigaaho.n se mastii

nigaahe.n churaane ke din aa rahe hai.n

sabaa phir hame.n puuchhatii phir rahii hai

chaman ko sajaane ke din aa rahe hai.n

chalo "Faiz" phir se kahii.n dil lagaaye.N

sunaa hai Thikaane ke din aa rahe hai.n

By Faiz Ahmed Faiz

Kuch Ishq Kiya, Kuch Kaam Kiya

 Kuch Ishq Kiya, Kuch Kaam Kiya
Woh Log Bohot Khush-Qismat The
Jo Ishq Ko Kaam Samajhte The
Ya Kaam Se Aashiqi Karte The
Hum Jeete Jee Masroof Rahe
Kuch Ishq Kiya, Kuch Kaam Kiya
Kaam Ishq Ke Aarey Aata Raha
Aur Ishq Se Kaam Ulajhta Raha
Phir Aakhir Tang Aa Kar Hum Ne
Dono Ko Adhoora Chor Diya
(Faiz Ahmed Faiz)