Baad Muddat Usey Dekha, Logon
Wo Zara Bhi Nahi Badla, Logon
Khush Na Tha Mujh Se Bichar Kar Wo Bhi
Us Ke Chehre Par Likha Tha, Logon
Us Ki Aankhen Bhi Kahe Deti Theen
Raat Bhar Wo Bhi Na Soya, Logon
Ajnabi Ban Ke Jo Guzra Hai Abhi
Tha Kisi Waqt Mai Apna, Logon
Dost To Khair Koi Kis Ka Hai
Us Ne Dushman Bhi Na Samjha Logon
Raat Wo Dard Mere Dil Mai Uthaa
Subha Tak Chain Na Aaya, Logon
Pyaas Sehraaon Ki Phir Taiz Hui
Abr Phir Toot Ke Barsa, Logon
..Parveen Shakir..
